Pedro Gunnlaugur Garcia Pedro hlaut árið 2017 Nýræktarstyrk Miðstöðvar íslenskra bókmennta fyrir fyrstu skáldsögu sína, Málleysingjarnir (2019), sem hlaut einróma lof lesenda og gagnrýnenda.
Pedro skaut þó almennilega upp á stjörnuhiminn bókmenntaheimsins með annarri skáldsögu sinni Lungu (2022), sem hann hlaut Íslensku bókmenntaverðlaunin fyrir. Í bókinni er sögð fjölskyldusaga sem nær yfir margar kynslóðir. Pedro nýtir sér töfraraunsæi í skrifum sínum á áhrifamikinn hátt og fléttar saumlaust við næmar lýsingar á þeim flækjum sem fyrirfinnast í mannlegum samskiptum og fjölbreyttum áskorunum nándar í samböndum.
Í umsögn dómnefndar bókmenntaverðlaunanna segir: Töfrandi og vel fléttað verk sem teygir anga sína vítt og breitt í tíma; fullt af frásagnargleði og fjölskrúðugum persónum. Sagan rýnir í samfélagið á frumlegan hátt þar sem framvinda verksins og afdrif persóna kemur sífellt á óvart. Höfundur heldur vel á þræðinum í ættarsögu sem tekst á við mismunandi viðhorf kynslóða til lífsins og áskorana þess. Verk sem spyr áleitinna spurninga og dvelur lengi hjá lesandanum.
Viðburðir með Pedro Gunnlaug Garcia:
