Bókmenntahátíð í Reykjavík hleypir lífi í rithöfunda og lesendur í ellefta skiptið dagana 11.-15. september 2013. Norræna húsið, Iðnó, Harpa og fleiri skemmtilegir staðir í borginni opna dyrnar fyrir bókmenntum hvaðanæva að úr heiminum. Það verður hlustað, lesið, spjallað, rifist, og það verður gert á mörgum tungumálum. Þá er einnig í bígerð spennandi dagskrá Bókmenntahátíðar og PEN International, alþjóðasamtaka rithöfunda sem vilja standa vörð um tjáningarfrelsið, en árlegt þing samtakanna verður haldið á Íslandi samtímis Bókmenntahátíð í Reykjavík.
Sautján höfundar frá sextán löndum hafa boðað komu sína til Reykjavíkur og tíu íslenskir höfundar taka þátt. Þeir eru:
- Svetlana Alexievich frá Hvíta-Rússlandi
- Douglas Coupland frá Kanada
- Kiran Desai frá Indlandi
- Jenny Erpenbeck frá Þýskalandi
- Kjell Espmark frá Svíþjóð
- Nuka K. Godtfredsen frá Grænlandi
- Georgi Gospodinov frá Búlgaríu
- Rachel Joyce frá Bretlandi
- Herman Koch frá Hollandi
- Kim Leine frá Danmörku
- Ewa Lipska frá Póllandi
- Mazen Maarouf frá Palestínu
- Alain Mabanckou frá Kongó
- Madeline Miller frá Bandaríkjunum
- Steve Sem-Sandberg frá Svíþjóð
- Antonio Skármeta frá Chile
- Can Xue frá Kína
- Auður Jónsdóttir
- Eyrún Ingadóttir
- Gerður Kristný
- Guðmundur Andri Thorsson
- Hermann Stefánsson
- Hugleikur Dagsson
- Rúnar Helgi Vignisson
- Stefán Máni
- Sölvi Björn Sigurðsson
- Þorsteinn frá Hamri
Nánar má lesa um erlendu höfundana með því að smella hérna og lesa má um íslenska höfunda með því að smella hérna.
En svo verður líka dansað og spilað og hlegið. Rithöfundar hitta forvitna lesendur og lesendur hitta forvitnilega rithöfunda. Útgefendur heyra nýjar raddir og hitta aðra útgefendur. Skáld hitta skáld. Skáld dansa við skáld. Og lesendur dansa við uppáhaldshöfundinn sinn.
Það er líf og fjör í þessari hátíð, Bókmenntahátíð í Reykjavík, sem var haldin í fyrsta skipti árið 1985. Thor Vilhjálmsson rithöfundur, Einar Bragi skáld og Knut Ödegård þáverandi forstöðumaður Norræna hússins stofnuðu til hátíðarinnar og varð hún fljótt einn af helstu viðburðum íslenska bókmenntasamfélagsins. Hún er vinsæl meðal alþjóðlegra höfunda og útgefenda og þykir ein mikilvægasta bókmenntahátíðin í Norður-Evrópu.
Á Bókmenntahátíð í Reykjavík gerist alltaf eitthvað óvænt og skemmtilegt! Dyr hátíðarinnar standa öllum opnar, nálægð lesanda og höfundar eru aðalsmerki hennar, sem og einstaklega skemmtileg og hlýleg stemning sem gestir fyrri hátíða tala fallega um. Viltu vita meira? Skrifaðu á info (at) bokmenntahatid.is.
Árið 2011 var sett upp ljósmyndasýning þar sem sýndar voru myndir og sagðar sögum af nokkrum gestum fyrri hátíða. Hér má skoða sýninguna: Nokkrir gestir // A Few Guests